1. ആറന്മുള

ആറന്മുള എന്ന് കേള്‍ക്കുമ്പോള്‍ നമ്മുടെ എല്ലാം മനസ്സില്‍ ഓടി വരുന്നതു അവിടെ സ്ഥിതി ചെയ്യുന്ന ശ്രീ പാര്‍ത്ഥസാരഥി ക്ഷേത്രം ആണല്ലോ.
അപ്പോള്‍ പിന്നെ നമ്മള്‍ ആ മനോഹരമായ ക്ഷേത്രത്തെ കുറിച്ചു ഒന്നു അറിയണ്ടേ.

ദക്ഷിണ കേരളത്തിലെ പ്രശസ്തമായ കുറച്ചു വിഷ്ണു ക്ഷേത്രങ്ങളില്‍ ഒന്നാണ് ആറന്മുള ക്ഷേത്രം. ശബരി ഗിരികളില്‍ നിന്നും ഉല്‍ഭവിക്കുന്ന പമ്പ നദിയുടെ ഇടത്തേ കരയിലായിട്ടാണ് ക്ഷേത്രം സ്ഥിതി ചെയ്യുന്നത്.
പഞ്ചപാണ്ഡവന്മാരാല്‍് നിര്‍മിതമായ അഞ്ചു ക്ഷേത്രങ്ങള്‍ ആണ് ചെങ്ങന്നൂര്‍ ഭാഗത്ത് ഉള്ളത്. അവയില്‍ ഉള്‍പെടുന്നു ആറന്മുള ക്ഷേത്രവും. അര്‍്ജ്ജുനന്‍് ആണ് ആറന്മുള ക്ഷേത്രം പ്രതിഷ്ഠിച്ചത്. മറ്റു നാള് ക്ഷേത്രങ്ങള്‍ ചെങ്ങന്നൂര്‍ ക്ഷേത്രം, ത്രിപ്പുലിയൂര്‍ ക്ഷേത്രം, തിരുവന്മുണ്ടൂര്‍ ക്ഷേത്രം, തൃക്കൊടിത്താനം ക്ഷേത്രം എന്നിവയാണ്.
ക്ഷേത്രത്തിന്റെ കിഴക്കേ നടയില്‍ നിന്നു ക്ഷേത്രത്തിലേക്ക് പ്രവേശിക്കാന്‍ പതിനെട്ടു പടികളാണുള്ളത്. വടക്കേ നടയില്‍ കൂടി ഒരു അന്‍പത്തി ഏഴ് പടികള്‍ ഇറങ്ങിയാല്‍ പമ്പാ നദിയില്‍ കാല്‍ നനയ്ക്കാം.
മഹാഭാരത കാലത്തു അര്‍ജ്ജുനന്‍ ശബരിമലയ്ക്കടുത്തുള്ള നിലയ്ക്കല്‍ എന്ന സ്ഥലത്താണ് പാര്‍ത്ഥസാരഥി പ്രതിഷ്ഠ നടത്തിയത്. അവിടെ നിന്നു ആറു മുള കെട്ടിയ ചങ്ങാടത്തിലാണ് വിഗ്രഹം ആറന്മുളയില്‍ കൊണ്ടുവന്നത്. അങ്ങനെ ആണത്രേ സ്ഥാലത്തിനു ആറന്മുള എന്ന പേരു കിട്ടിയത്.

ചിങ്ങ മാസത്തിലെ ഉതൃട്ടാതി നാളില്‍ നടക്കുന്ന വള്ളംകളിയാണ് ആറന്മുളയുടെ മറ്റൊരു പ്രത്യേകത.
ഏകദേശം നാല്‍പ്പത്തി രണ്ടു ചുണ്ടന്‍ വള്ളങ്ങളാണ് (അഥവാ പള്ളിയോടങ്ങള്‍ ) അന്നത്തെ ദിവസം പമ്പാ നദിയില്‍ മത്സരത്തിനിറങ്ങുന്നത് .

ആറന്മുളയിലും പരിസര പ്രദേശങ്ങളിലും താമസിക്കുന്ന ആളുകള്‍ക്ക് മറ്റൊരു ഓണം ആണ് വള്ളംകളി.

വഞ്ചിപ്പാട്ടിന്റെ താളത്തില്‍ ഉത്സാഹ തിമര്‍പ്പോടെയുള്ള ആ കാഴ്ച ഒന്നു വേറെ തന്നെ ആണ്. ഓരോ വഞ്ചിയിലും തലപ്പത്ത്‌ നാലു പേരും തുഴക്കാരായി നൂറു അല്ലെങ്കില്‍ നൂറ്റിയിരുപതു ആളുകളും കാണും. അത് കൂടാതെ ഇരുപത്തിയഞ്ച് വഞ്ചിപ്പാട്ടുകാരും കാണും. ആറന്മുള ഭഗവാനെ പ്രകീര്‍ത്തിച്ചു കൊണ്ടുള്ളതായിരിക്കും മിക്ക വഞ്ചിപ്പാട്ടുകളും.

പിന്നെ ആറന്മുളയുടെ മാത്രം സ്വന്തമായ മറ്റൊന്നാണ് ആറന്മുള കണ്ണാടി. ഇതിന്റെ നിര്‍മാണ ശൈലി തന്നെ ആണ് ഇതിനെ വിശിഷ്ടമാക്കുന്നത്.